كوليكشن تويتات استفضت فيها شوية فجمعتها هنا
لقيت هاشتاج اسمه #نصابين_تويتر قُلت ادخل اشوف الدنيا إيه، لقيت ناس بتحكي عن نصب اتعرضت له وناس بتواسيهم وناس تقول "لازم ناخد بالنا ياجماعة".
تاخدوا بالكم من إيه وفين؟!! انتوا سذج ومغفلين والله اكتر من الناس اللي بيتنصب عليها، النصب دا ظرف مش مفهوم أصلًا ولا ينفع ينكشف قبل حدوثه..
أنا -وأنا وبافترض في نفسي الذكاء والصياعة والنباهة والصعلكة بشكل مبالغ فيه- اتعرضت لأوسخ حالة نصب في التاريخ، ساهمت بإتمام حالة النصب عليا..
الواد ابن اللعيبة رمي خيط وانا شديته، الحقيقة كنا 3 مش انا لواحدي. واصطادنا، هو، من مئات الكيلومترات في أيام ونصب علينا في نص ساعة
جابنا من ابورديس/ج سينا، لمنطقة اسمها طعمة/بدرالصناعية/القاهرة.. الليلة حصلت في اقل من نص ساعة، كان مقلبنا في 3 موبايلات وحوالي 700ج
الغريب إن اول لحظة شكيت فيها إنه نصاب، تزامنت مع آخر مرة شوفت فيها ضهر عربيته.. لحظة بنت وسخة أوي، عجز شنيع وقلة حيلة.
كنت كاره نفسي فشخ وعاوز اعمل فيها حاجة، ومشاعر كتير اختلطت ببعضها شخير وضحك وخنقة وحاس ان الدنيا برد واحنا في صحرا وفي عز الصيف
24 ساعة بالوضع دا، ركبنا وماشيين، وفي نص طريق الاسماعيلية-بلبيس صاحبي بيرن على تليفونه من تليفون السواق لقاه مفتوح والواد رد..
ابن الوسخة زي اللي بيطلعلنا لسانه في التليفون، مصمم انه ماسرقش.. بيكمل نصبته، حس اننا بنلاحقه مثلًا فبيضللنا مرة أخيرة..
قالنا انتوا مشيتوا ليه انا رجعت ع الكافتيريا -عشان لو كنا بنلاحقه نرجع للمكان تاني ويكسب وقته- والحقيقة اننا سلمنا امرنا ومشينا في اتجاه معاكس
كان في أمل ع الأقل 1% انه احتمال يكون صادق، بس كنت هاتقهر اكتر لو رجعت ومالقيتوش وانا عارف انه حوار، دي اصعب بجد..
اتنين مننا رفضوا الرجوع والتالت كان عاوزنا نرجع، والسواق اتفق معانا الاتنين وقال ان تفسيري صحيح، الواد خايف وعاوز يبعدنا عنه.
اللي قدرت آخده من حقي اني قولتله عمري ماهنساك والدنيا ضيقة، فضلت اكررها بصيغ مختلفة وبهدوء خالص، لدرجة اني لمست خوفه..
وفعلًا انا كنت مقتنع بدا، وارد جدًا اني اقابله، زي ماقابلت ناس كتير عرفتهم لوقت قصير، في ازمنة واماكن عمري ماتخيلت اشوفهم فيها تاني.
صاحبي اللي كان عاوزنا نرجع دا كان بيقوللي: انت مجنون؟!! خلينا نتفاوض معاه، تفيت في وشه..
مش لأي حاجة خالص غير انه لسة مافاقش ومش مدرك اننا اتخذوقنا، وبوضعه دا ممكن ياكل 40 نصباية في 10 دقايق.
واحد نصب عليك، هتفاوضه بايه؟؟ انت تملك ايه اصلا ممكن تفاوضه من خلاله و تقنعه بالعودة؟ وبعدين هتنصب على نصاب!!
آخر تويتة.. كان بيتقاللي "مابلاش" والله ياجماعة زي ما سعيد صالح كان بيقول لعادل امام في رجب فوق صفيح ساخن :(