Digital clock

الاثنين، 25 نوفمبر، 2013

ليلة القبض على واحد شايل 790ج.


ليل داخلي - مكتب معاون المباحث بالدور العلوي بمركز شرطة فرشوط - قنا


شاب في منتصف عقده الثالث، ذو شارب يشبه الى حد ما "شنب المطرب الستيناتي شفيق جلال"، يجلس على مكتب وُضِع على سطحه في الواجهة لافته جلدية مقاس 45×15، كُتب عليها.. " نقيب مصطفى حلمي"، ضغط على زرّ بجواره وقبل ان يرُد الطرف الآخر، قال: هاتوه.
 قام من على كُرسيه مُتجهًا الى الحمام الداخلي للغُرفة، و دون ان يُغلق الباب، فتح صنبور المياه ليتخلّص من بقايا وجبة الكُفتة العالقة باصابع يديه الاثنين، المُرسلة اليه مجانًا من رضوان الحاتي، القابع محلّهُ في مدخل شارع قشم الشُرطة، والذي يُرسل اليه وجبة يومية طمعًا في رضا الباشا وتجنُّبًا لسخطه ومضايقاته.

( اللي مالوش خير في حاتم مالوش خير في مصر ) .. خالد صالح - هى فوضى

في اللحظة ذاتها..

دخل سمير -امين الشُرطة النوبتجي- وتحت يده كتف المُتهم المطلوب.
- تمام سعادتك
- مين دا ياسمير.؟؟
- دا واحد اخواني لقيناه ماشي في الشارع شديناه.
- ايوة يعني تهمتُه ايه.؟؟
- اخواني سعادتك.
- لقيتوا معاه سلاح او حاجة.؟؟
- لا ياباشا، بس لقينا في محفظته 1000ج.
عاد الظابط ليجلس على مكتبه، نظر في عيْنا المتهم قرابة ال20 ثانية، واردف:
- فك الحديد من ايده ياسمير، وقولتلك قبل كدا مايتكلبشّ خلفي غير المُسلّح.
بعد ان اُطلقت يداه من الكلبشات، شرع طلال "المتهم" في الجلوس دون اذن من الظابط، ففُوجئ بضربة سريعة وقوية على المكتب، والظابط مرددًا: 
- وحياة امك.؟؟ انت قاعد في بيتكوا والا ايه.!! قوم اقف يالا
(وفي لمح البصر، نظرة من عين الظابط في عين امين الشُرطة، تُرجِمت الى قفا من الخلف مصحوبًا بعبارة" ماتقعدش غير لما الباشا يأذنلك يالا)
- آسف حضـ...
- ماتتكلمش غير لما اقولك يالا، ايه الفلوس دي.؟؟

( هنا مفيش غير قانون واحد بس، قانون حاتم ) خالد صالح - هى فوضى

- دي حوالة من اخويا اللي في السعودية ياباشا، بيخلّص شُغل في شقته وانا المسئول هنا عن الصنايعية واجورهم واكلهم وكدا، ودي تالت مرة يبعتلي فلوس وممكن ماتكونش الاخيرة لان لسة شُغل كتير وهو مش هينزل غير ع الجواز على طول لان فترة اجازته بتبقـ...
- خلاص في ميتين امك انت هتحكيلي قصة حياتك.!! ودّيه الحجز ياسمير وتعالالي بسُرعة.
(دقيقتين وعاد سمير)
قفلت المحضر ياسمير.؟؟
- لسة ياباشا مش عارفين حضرتك نهاديه بايه.
- اعمل له 790ج حِرز وهاتلي الباقي.
- اشمعنى ياباشا.؟؟ ما ألف جنيه احسن علشان التـ...
- انت هتريّس عليا ياعرص والا ايه.؟؟
ماعاش ولا كان ياباشا، انا بس عاوز افهم سعادتك، اشمعنى الرقم دا.؟؟
- اعلمك وكُله بثوابه، الارقام المُعتادة كذابة ياسمير، 500 و1000 والكلام دا مش هياكُل مع النيابة، انما الكسور بتفُور.. بيشربوها يعني، ومن ناحية تانية نُرزق برضه، هما ال800 خرا اللي بناخدهم م الوزارة يأكلوا عيش.!!
ياللا روح بسرعة، اعمل اللي قولتلك عليه، وماتنساش، سبعة الصُبح تعرضُه ع النيابة.

روابط يُجدر الاشارة اليها..

القبض على قيادي إخواني بحوزته 790 جنيهًا في قنا