Digital clock

الاثنين، 14 أكتوبر، 2013

علشان تكمّل فرحتك بالعيد.


كل سنة وانتوا طيبين قبل كل شئ :)
نُدخل في الموضوع على طول علشان مفيش وقت والحياة قصيرة فشخ والموضوع اللي بنتكلم فيه طويل
:D ، في حدثين بُكره مرتبطين ببعض  هيترتب عليهم السعادة او التعاسة للبلد بحالها (اول يوم العيد - ماتش الذهاب لاهم حدث كروي بننتظره كل 4 سنين)

 مبدئيًا فكرة الفوز شبه مستحيلة وان كانت مرغوبة. فهنركن الموضوع دا على جنب ونخرجه من التوقعات، نفكّر في التعادُل.. التعادُل جميل جدًا خاصةً وان كان بأى نتيجة ايجابية.. ليه بقى.؟؟

للأسباب دي ياسيدي

-
لأنك بتلعب مباراتين يأهلوك لاهم بطولة قارية، على عكس ماتكون بتلعب في التصفيات التمهيدية او كاس الامم او اى دورة افريقية مجمعة.. فالفريق اللي هتلاعبه هيكون متحمس جدًا زيك بالظبط وهيجيب آخر ماعنده، حتى لو كانت جزُر القمر هتضايقك ومش هتحقق سكور عالي. فمابالك ان دي غانا.!!!

-
غانا.!!!!!!!!! وايه يعني.؟؟
لا مش ايه يعني، لو كان اى منتخب تقيل آخر زى ساحل العاج او الكاميرون كنت هاقولك المعادلة متكافئة وكل التوقعات ممكنة ومتاحة، لكن غانا بالذات لا، دونًا عن اى منتخب في القارة للآتي:.

لياقة بدنية وسُرعات وقوة جسمانية والتحامات خيالية، وفي المقابل حدّث ولاحرج.
جماهير لاتكلّ ولا تملّ تشجيع 90د، اعداد كبيرة زيك بالظبط قد تصل لـ80 الف.
ارضية ملعب زى الزفت لاتصلح للاستخدام الآدمي، هما فقط اللي بيعرفوا يلعبوا عليها.
طقس خط الاستواء اللي احنا مش مُكيَّفين عليه، رطوبة + هبّات ريح + درجة حرارة عالية وموجات باردة في نفس الوقت، يعني اللاعب بيبقى عنده "حُمّة" لحظية خفيفة بيشعر بيها لطبيعة المكان.
 شُغل سِحر معروف عنهم من قديم الازل بيدمروا بيه سيكولوجية لاعبينا بحركات زى رش الميّه ع الحارس او على خط المرمى اثناء الماتش، ودا اتكرر مع المنتخب اكتر من مرة ومع الزمالك ايضًا.
غانا منتخب بطولات زينا وتقريبًا هو المركز التاني بعدنا في عدد الحصول على كاس الامم الافريقية برصيد 4 بطولات، يعني عارفبن من اين تُؤكل الكتف ومش مبتدئين ولا هواة.
عندك ياسيدي (خط وسط وهجوم عالمي) بالمعنى الحرفي للعبارة، كلهم بلا استثناء لعبوا ومازالوا في افضل اندية العالم، تشيلسي وريال مدريد والميلان والانتر ومارسيليا وشالكة..الخ، حتى اللي مش محترف في الاندية دي هو احرفهم واخطرهم. اسمواه جيان "العين الاماراتي"، راح عشان الفلوس ابن المرة xD.
واخيرًا وليس آخرًا << دا الجيل اللي واخد كاس عالم 2009 للشباب >>.
-
للاسباب السالف ذكرها لازم تفتنع ان التعادُل كويس جدًا جدًا، حتى الهزيمة -1 كويسة وفي قدرتنا نعوّض في العودة ان شاء الله، دا علشان تكمّل فرحة عيدك.

ملاحظة أخيرة
| دي التوقعات البديهية اللي بيفرضها المنطق مش رغبتي، لكن اتمنى طبعًا نكسب 5 بس ازاى.؟؟ :)