Digital clock

الخميس، 1 أغسطس، 2013

حقائق ومَطالب من النظام الحاكم .



-
عدلي منصور رئيس طرطور جديد قاعد جنب سماعة التليفون بيستني الاوامر وينفّذ .

-
مش محتاج أني الاقي سامي عنان او احمد شفيق على كرسي الحُكم علشان اصدّق ان الجيش رجع يحكُم تاني، الجيش بيحكُم حاليًا، مش بيتدخل في الشئون السياسية فقط .. لا دا بيحكُم فعليًا ، وعلشان تستوعب دا كفاية نظرك يكون كويس مش بالضرورة عقلك ، وان تماديت في "نفخ" السيسي مش هيسيب الكُرسي .. وكُله بالحُب .

-
فض اى اعتصام لاى تيار او حزب سياسي يعني تعدّي على مكتسبات الثورة في حرية ابداء الرأى بالطُرُق المشروعة ، وليس اعتداء على الفصيل المعتصِم ، كما أنه ترسيخ لعودة الدولة البوليسية مرة اخرى، لكن لما ترجع هترجع أقوى ، لأنها اخدت دروس كفاية في الاحتراز من غضب الشارع واتعلمت ازاى تسد الثغرات دي كويس بعد كدا من خلال تعاملها مع اكتر من 100 مظاهرة على مدارة سنتين ونصف .

-
مطلوب من السيسي ان يسكُت ولا يصدر عنه بيان سياسي وان يعرف حجمه كوزير للدفاع ولا يُفرط في الجهر بأنه الرئيس الفعلي وان عدلي ماريونيت بيلعب بيه من ورا الستار ، مطلوب من عدلي ان يأخذ مكان السيسي ويستبدل صيغة خطاب الكراهية بصيغة لم الشمل وتحديد خارطة بمدة زمنية اقصاها 6 اشهر للانتهاء من صياغة دستور جديد واجراء انتخابات نيابية ورئاسية ، مطلوب من حازم ببلاوي اقالة وزير الداخلية الحالي وطمئنة المعتصمين بدلًا من ادخال الرعب عليهم ، والعمل على بقاء الوضع اقتصاديًا على ماهو عليه الى انتهاء فترته الانتقالية ، مطلوب من الاخوان واللي مش اخوان بس بيحترموهم قناعة نسبية ستتصاعد الى درجة اليقين مع مرور الوقت بأن عودة مرسي مستحيلة.

-
مطلوب من الشرطة ان تتعامل مع المعتصمين برد فعل على قدر الفعل الناتج عنهم ، على سبيل المثال...

ان كانوا المتظاهرين يهتفون فقط او يرفعوا لافتات حتى وان تضمنت هذه اللافتات عبارات مُعادية للنظام الحاكم او الشرطة نفسها ، فيكون رد الفعل هو الثبات وعدم التعرّض لهم بالأذى ، ان كان قذف حجارة او مولوتوف على الشرطة فالرد يكون باطلاق الغاز والتفريق بالمياه ، ان كان وسط المتظاهرين من يطلق النار سواء ان كان خرطوش او رصاص حى على الشرطة ، فالرد يكون بالتحذير والتنبيه على ان الرد سيكون عشوائي وان لم ينتهوا فليكون الضرب بنفس المادة ، في كل الاحوال تكون الشرطة في موضع رد الفعل وليس المبادرة . 

-
انا مش اخوان ولا باحترمهم ولا محتاج اقول دا في كُل بوست لان نفي العدم شبه اثبات ، انا بس عاوز افكرك يا مُدعي المدنية والديمقراطية انك استبدلت فاشية دينية بفاشية عسكرية ، لو بترضي نفسك امام الناس وتقول دا الجيش بيحكُم مرحلة انتقالية وهيرجع ثكناته ، احب اقولك ان تفويضك اعطاه توكيل بمدّ المرحلة الانتقالية الى مالا يقل عن 10 سنوات بزعم الحرب ع الارهاب " دي اقصر مدة خرج منها جيش دولة حكَم تحت شعار الحرب ع الارهاب " وانت قاعد مع نفسك مش هترضى عن المبرر دا .