Digital clock

الأربعاء، 1 مايو، 2013

يــارب


يارب 
ياللي سايبلي الحبل ع الغارب
أنا غرقان بدون قارب
ومعرفتش أعوم وحدي
وكل ما امدلك يدي
وتنشلني
وأعوم شبرين
إيديّا يفلفصوا الإتنين
وأقولك سيبلي انا الباقي
تسيبلي الحبل ع الغارب
تخش المية حلقي .. اشرق
فاصرُخلك .. وأقول بغرق
وأقولك عمري ما حسيبك
فتنشلني
أعوم شبرين
إيديّا يفلفصوا الاتنين
وأسيب إيدك
وأعيد الكرَّة 100 مره
وماتخذلنيش ولا مره
تقوللي حضنهم بره
لا عمره يساع دراع سيدك
وانا لسه
بسيب إيدك .!!!
                                                                        مصطفى ابراهيم