Digital clock

الجمعة، 30 نوفمبر، 2012

" كـُـله بالحـُضن ( عيب ياريّس ) ".


" معادلة بسيطة جدا " ، انت ازاى تعطي لنفسك حق باصدار اعلان دستوري مش من اختصاصك بدواعي استثنائية للمرحلة ، ومضمون الاعلان نفسه عاوز تمشيه بالقانون .!!!

بمعني .. طالما قولت ثورة ثورة ومشيتها اهداف ثورة ، ليه معملتش محاكم استثنائية علشان نلاقى ادانات حقيقية لكل من هرب بالتحايل على القانون وبموالاة بعض القضاه كما قولت .؟؟؟

 ليه بتربطها بظهور ادلة جديدة ، افرض مظهرش ادلة جديدة .؟؟ - اللى انت موكل اهالي الشهدا بالعمل على ايجادها اصلا -تبقى خزوقتنا فى الدستور والشورى وانتهى غرضك ومفيش اعادة محاكمات ودى كانت شعارات .!!

عيب ياريس الشعب مش عبيط ، القانون اللى انت بتشتغل الناس بيه والمحاور كذبّك وانت صممت ع الكذب ، المحاور :  اليس كان قانونيا من قبل.؟؟ ، انت رديت وقولت لا ، وهو موجود من قبل ماتتولد . اى قضية فى العالم واخدة حكم بالحفظ او منطوق فيها حكم لو ظهر ادلة جديدة بتعاد التحقيقات تاني مش الحكم بس كمان ، دا القانون المصري .فضلا عن ان اعادة المحاكمات كمان مقتصره على ماقبل 11 فبراير ، طيب واللى بعد كدا مش شهدا فى عُرف الاخوان ؟؟

 عيب ياريس المادة بتاعت مساواة معاش المصاب وفاقد النظر فى الثورة بمعاش الشهيد مش دستورية اصلا ، دا قرار عادي ممكن تاخده فى اى وقت ويتنفذ فورا ، دا ممكن رئيس الوزرا اللى يعمله قرار او وزير كمان مش محتاج لاعلان دستوري ، انت بتكسب عطف الناس بتحبيشات تغطي بيها المصايب التانية ؟؟؟

عيب ياريس القانون اللى بتقول باحترمه وباعمل على استقلال السلطة القضائية ، انت نفسك حصنت قراراتك من الطعن عليها لاى سبب وامام اى جهة ، حتى القرارات اللى لسة ما اتخدتش ، دا احترام قانون ..؟؟؟ " قمة التناقض ".

واخيرا .. 

لو كان عندك اسباب حقيقية ودوافع وراء اعلانك دا كنت قولتها كلها النهاردة ، انت اتكلمت اكتر من ساعة ومحدش عرف انت عاوز تقول ايه ، اقسملك برب البيت انت نفسك لو اتفرجت فى الاعادة ماهتفهم انت عاوز تقول ايه ، وبشهادتك : " الحق ابلج والباطل لجلج ".

 لو سمحت بقى طلع اعلان دستوري للتليفزيون المصري ينُص على ترجمة لقائك باللغة العربية

 مع خالص احضاني ياريس 

الاثنين، 19 نوفمبر، 2012

ماذا يفعل هؤلاء فى حكومة الثورة .؟!!!


* تنويه .. " لإستيعاب ما ورد فى هذا المنشور ، يرجى التجرد من أى انحياز لطرف سياسي ما " .

مرت وتوالت على بلدنا ازمات ، اكدت فشل الحكومة الحالية فى ادارة الوضع الداخلي لمصر ، ولا بد من تغيير بعض الوزارات فيها او حل الحكومة جذريا  واعادة تشكيلها مرة اخري ، هذا هو رأى المدون ..
رأيك انت لا أعلمه ، هو متروكا لك تقييما لما شاهدته انت من الاحداث الماضية ، وتولدت لديك قناعة بالايجاب او السلب تجاه الحكومة ، ولكن .. دعنا نتحدث بالمنطق والعقل ..
هل هذه الحكومة على المستوى الذى آملناه او انتظرناه من نظام بعد ثورة مجيدة .؟؟
سأحدثك اليوم فقط على 6 مناصب بايجاز ، دون تفاصيل معقدة ويمكن لك التأكد بالرجوع الى محركات البحث وغيرها من الصحف لما كتبته ..

* ماذا يفعل هؤلاء فى حكومة بعد ثورة .؟!!!!!!!!!!!! 


1- رئيس الحكومة *

.. هشام قنديل ..
- مدير مكتب وزير الموارد المائية والري لشؤون مياه النيل خلال الفترة من 1999 حتى 2011 ( 12 عام فى نظام مبارك )
- ليس لديه موقف ثوري اما بالتضامن مع الثورة او الفكرة فى التغيير وغير مؤهل لان يكون رئيس لوزراء فنحن فى وقت لا يسمح بالتجربة
- صاحب مقولة اللي نزلوا يوم محمد محمود نوعين .. بلطجية وصبية مأجورين .

                         **************************

2- وزير المالية * 

.. ممتاز السعيد .. 

- لا يملك أي مؤهلات مهنية بل متهم بإصدار قرارات تسببت في إهدار المال العام

- الدراع اليمين ليوسف بطرس غالي ومهندس الميزانيات فى عهد مبارك على مدار 30 عام .. - اغرق مصر فى فى ديون بعشرات المليارات . 

                         **************************


3- وزير الداخلية *

.. أحمد جمال الدين ..
- ابن شقيق عبد الأحد جمال الدين " عضو الهيئة العليا لقيادات الحزب الوطني وامين الشباب " هومن سانده للوصول الى هذا المنصب بالتدرج الرهيب الذى توالى فى عهد منصور العيسوي ومن بعده محمد ابراهيم " .
- عمل مدير امن لاسيوط اثناء الثورة وشارك فى قمع المتظاهرين واعتقال العديد منهم وقتل البعض ايضا باوامر مباشرة .... قال على الثوار بلطجية مرتين الاولى اثناء الثورة والثانية اثناء وقفات مجلس الوزراء .
- شاهد نفي فى قضايا قتل الثوار . 

                        ***************************
4- وزير التنمية المحلية *

.. أحمد زكي عابدين ..
- محافظ كفر الشيخ السابق، والذى خرجت العديد من التظاهرات الرافضة لوجوده كمحافظ قبل أن يتم تصعيده لمنصب وزير التنمية المحلية .
- عضو سابق بالحزب الوطني المنحل . 

                       ***************************
5- وزير البترول *

.. أسامة كمال ..
- صديق مقرّب من سامح فهمي وعضو لجنة السياسات بالحزب الوطني المنحل .

                       *************************

6- وزير الرياضة *                      

.. العامري فاروق ..

- عضو لجنة السياسات بالحزب الوطني المنحل .
- مرشح عن الحزب الوطني فى دائرة الدقي والعجوزة عام 2010 . 

                                    &&&&&&
                                 _________________________________
لن اقول لك
محمد حسين طنطاوي القاتل مستشار للرئيس الآن
و سامي عنان شريكه فى القتل مستشار للرئيس الآن
و كمال الجنزوري الذى تحدى البرلمان وشباب الثورة وجميع القوى السياسية والثورية تطبيقا لرغبة المجلس العسكري ايضا هو الاخر مستشار للرئيس الآن
لن اقول لك ان فاروق العقدة رئيس البنك المركزي ومهندس تنظيم الفساد وتقسيم التركة ما زال على مقعده

* ايضا هؤلاء باقون فى الأمان بقرارات من الرئيس ، الذى يطلب منا الصبر على مواجهة الفساد وهو يحميه ولكن الحديث بشأن الحكومة الفاشلة العاجزة فلن نتطرق الى الحديث بشأن مناصب قيادية فلولية اخرى فى مؤسسة الرئاسة  .
وبعد كل هذا نرى اناس يخرجوا علينا بكلمات .." الصبر ، البلد غرقانه فساد 30 سنة ".. متفق معاك .. ولكن
 هل من العقل ان تأتى وانت مخيّر غير مجبر بقيادات من الحزب الوطني ولجنة السياسات فى العهد البائد ؟؟؟
لو الاجابة بانهم اشراف .. اذا انت اتممت عملية الفرز وعرفت من الشريف من المدلس فى العهد البائد .. فلماذا لا تقضي على الاوساخ منهم ..؟؟

              ** انت تستعين بالمفسدين للقضاء على الفساد ** 

 ِ                           AshrafMostafa

الخميس، 15 نوفمبر، 2012

صراع الشر والخير فى زمن التغيير


- الي الحمار اللى نظرية المؤامرة واكله عقله ، وغالبا ما بيكون فلولي صرف ومعترف ويتباهى بكدا .

- يعنى ايه الفلسطينيين ياخدوا سينا او يسرقوها او يشتروا فيها اراضي ..الخ من كل المصطلحات البذيئة مثلك التى تـُروّج للتخوين .؟؟؟

هل تعلم ان المواطن الفلسطيني بيتعرض عليه مبالغ لم تراها عائلتك طيلة عمرها والتجنيس فى اى دولة بالعالم يختارها هو ، نظير انه يترك الارض ويُقر على ورقة بعدم حق العودة.؟؟

  ومع ذلك .. بيرفض ومتمسك بالنضال ، اللهم الا قليل ـ ممن يأسوا ورأوا فى هجرتهم بمن تبقى من عائلتهم بعض من بريق الحياة ـ .

هل تأملت فى واقع يعيشونه ولو لـ10 دقائق من عمرك كله ..؟؟؟

انت الذي هرولت فزعا وخوفا وضيقا من صوت طائرتين مروا بسماء القاهرة منذ يومين . واطفالهم اعتادوا على القصف فى كل وقت ، على مرأى ومسمع من العالم دون تدخل ..

 قالها لى فلولي من قبل .: مش كل الاسرائليين وحشين - تبريرا لما ورد على لسان (العُـكش) من تحذير لهم من مرسي - ولما تماديت فى الحوار وقلت له انه لايوجد اسرائيلى او يهودي حلو وكلهم زي بعض ،، قال لي فى يهود احسن منك .

وقال اخر فى نطاق زمني اخر . : يعنى احنا بيجيلنا ايه من وراهم ياعم الا وجع الدماغ ،وبعدين هما باعوا اراضيهم من الاربعينات ، ولما رديت عليه بذلة لسان  وقلت له انت كذاب وافقدته احترامي الدائم له لكبر سنه المضاعف لعُمري .. قال لي انت حمدين والبرادعي لحسوا عقلك .

وطعن ثالث فيما ورد على لسان الصهيونية جولدا مائير " لم أنم ليلتها وأنا أتخيل العرب سيدخلون إسرائيل أفواجا من كل صوب لكني عندما طلع الصباح ولم يحدث شيء أدركت أن بإستطاعتنا فعل مانشاء فهذه أمة نائمة " .. فى اشارة الى تخاذلنا جميعا نحو القضية ، وقُلت له ان هذا الكلام يمزق كرامتي ويقلل من شأننا مسلمين وعرب معاصرين ، فرد قائلا .: الكلام دا مش حقيقى ، وهما عارفين اننا ممكن ندخل نطربقها عليهم فى نص ساعة ، وعارفين قدرنا وبيخافوا مننا ... احتسبته تهرب او انسحاب تكتيكي . من هنا يطرح سؤال طويل نفسه ، لكن اغلب القارئين يدركونه حقيقتا .

ليه اللى مع مبارك وشفيق ونظامهم " الفلول " ضد الثورة ، هو نفسه اللى مع بشار والجيش السوري ضد شعب سوريا والجيش الحر ، هو نفسه اللى بيبرر الاعتداء على فلسطين وبيتجاهل اللى بيحصل فيها ، ويوصل بيه الأمر الى تمجيد اليهود والتشهير بمسلمين وعرب مثله .؟؟!!!!!!!!!!!!!هل هذا ناقوس ابتداء صراع الخير مع الشر .!!!



                              Ashraf Mostafa