الأربعاء، 10 أكتوبر 2012

مجرد مواطن مجرد من كل شئ


انا 1 : الحمد لله ان شفيق سقط دا مرسي رحمة عنه بكتير
انا 2 : ليه ياعم انت خايف من شفيق اوى كدا ليه
انا 1 : ياعم انت هندي...؟ مش خوف ولا حاجة بس الراجل دا كان هيخربها تانى ومش هيقدم لا جديد ولا قديم ، ناهيك عن انه هيخرج كل رموز النظام السابق من السجن
انا 2 : تصدق انت عندك حق ، كانت فايتاني دي
                                            since 3 month ago
انا 2 : ايه يابرنس اخبار المحاكمات ايه ؟؟
انا 1 : بقولك ايه .. ابعد عن دماغى اهلى الوقتى علشان ماطلعش تتربنتتيت امك .. امشى ياض
انا 2 : هاهاااااااااااااااااااااى .. والله شكلكوا اتخيطوا واخدوا براءات برضه وكله باسم القضاء الشامخ
انا 1 : امشي يابن المرة من هنا بلا قضاء شامخ بلا قضاء شاخخ
انا 2 : طيب روق بس ياعم كدا وولع واحكيلى ايه اللى حصل
انا 1: ياعم كل الحرامية التقال واللى حرضوا على قتل المتظاهرين اخدوا براءة
انا 2 : طيب ازاى بقى اومال مين اللى قتل الناس دى واللى حرض على قتلهم .. الجمال خرجت مع نفسها كدا من الصحرا وقالت العيال دول وحشين ولازم يتربوا وقتلتهم ورجعت .؟؟
انا 1 : ياعم انت عبيط.. جمال ايه اللى هتمشى مع نفسها .. انت شكلك هيست وفخدت وهتقرف امي.. قوم ياعم روّح وسيبنى مع نفسي الله يهديك .
انا 2 : يا اخى ما اقصودش انا قصدى فين الناس اللى قتلت بقى لما دول ابرياء... طيب والمحكمة حكمت بايه.؟؟
انا 1 : براءة صفوت الشريف وفتحي سرور  ومحمد ابو العنين وجمال مبارك ..ياعم هعدلك مين ولا مين.. دول 25 واحد
انا 2 : يادين النبي .. 25 واحد ومطلعش ولا واحد فيهم مُدان .. طيب والجمال ما اتصرفلهاش 60 كيلو علف لكل جمل ولا حاجة .؟؟
انا 1 : والمصحف لو ماقعدت ساكت لضاربك زى وائل جمعة مابيضرب المهاجمين
انا 2 : خلاص ياعم .. انا آسف
انا 1 : قوم ياسيدى روح جيبلنا عشا وسجاير بدل اللى خلصت ..
                                              ومرت ساعتين
انا 1 : ايه ياحليتها اومال لو ببعتك  تغير فلوس من ويسترن يونيون كنت جيت امتى ..؟؟
انا 2 : ياعم روح هو انت حيلتك اللضا .. انت لاقى الجنيه لما هتبعتنى اغيرلك اجنبي لمصري
انا 1 : على رأيك قاعدين مش لاقيين فلوسنا فى بلدنا هانروح بلاد الناس نعمل ايه .. المهم ايه اللى اخرك كدا .
انا 2 : اول ماخرجت بوقف تاكسي علشان اروح قاللى هاخد منك 7 جنيه علشان البنزين غلي
انا 1 :7 جنيه .!!! ليه ابن ال..... دا ، ومركبتش سرفيس ليه ياننوس.. عامللى ابن ذوات
انا 2 : ياسيدى ماحنا طول عمرنا بنركب التاكسي ب2 جنيه جرا ايه يعني
انا 1 : طيب وركبت ايه ... ؟؟
انا 2 : ماركبتش  .. روحت مشي بعد ما ركبت سرفيس وفضل ربع ساعة واقف فى الدقي من ازمة المرور ..
انا 1 : كمان ..!! براءة مذنبين و سواقين المواصلات بيعلموا علينا علشان البنزين غلي  وازمة مرور .. المهم فين العشا ياسيد امك داخل عليا بالسجاير ولا شوفت طعمية ولا لانشون ولا جبنة ولاحتى رغيف حاف يوحد ربنا .. انت خبط الفلوس ولا ايه ياض
انا 2 : ياعم اهدى عليا انت ماسكني من الصبح غسيل ومكوى وبتعاملنى معاملة ماري منيب لفؤاد المهندس كدا مع انى طيب زى الاستاذ كمال ابو ريّه .. ماتخلي البساط احمدي
انا 1 : هههههه .. ضحكتنى يابن الوارمة وماليش نفس اضحك.. المهم متغطيش ع الحوار فين الاكل ..
انا 2 : مالقيتش عيش علشان المخبز الوقتى بيقفل بدرى دا غير ان لو روحت بالنهار اصلا مش هاخد غير بجنيه يعنى بالصلاة ع النبي لاهيكفينى انا وانت بس لغاية الوقتى .. دا غير ال6 اللى لسة هييجوا الوقتى من الشغل .
انا 1 : طيب دخلت عليا دى وصدقتك وهعيط .. فين باقى الاكل .؟؟
انا 2 : باقى اكل مين ياعم دا 4 جنيه .. وعلشان علبة السجاير غليت حطيتهم فى تمن العلبة .. ما انا لو رجعتلك من غير سجاير هترمينى من ع السطح
انا 1 :طيب بس يابن الفقرية لازم تعرف الناس اللى بتقرأ اننا ساكنين فى السطوح ومقدمين على شقة فى مساكن شعبية بقالنا 8 سنين بنسدد فى اقساط القسط الاول .
المهم هناكل ايه الوقتى ..؟؟
 خد ال 5 جنيه دى روح هاتلنا اى حاجة ناكلها ..
.. ربنا يسدها فى وشك لا مواصلات ولا عيش ولا بنزين ولا اى حاجة تحسسنى انك كنت فى الشارع من شوية اصلا .. حتى ريحتك سايبها هنا على ماترجع .. مش عاوز تعملها فلترة وتغيرها بشوية الهوا اللى هيقابلوك فى السكة .. الهي يقابلك بوكس والظابط يشتمك من غير سبب وتتهبل وترد عليه بالشتيمة وياخدك يعلقك ويقلعك..
انا 2 : بوكس مين ياعم .. ما انت عارف اننا عفاريت ومش هنغلب.. هطير منه فى اى شارع ضيق او خرابة
انا 1 : ايوة ياعم ابسط.. الزبالة بالهبل وهتعرف تتدارى منهم فى اى شارع يعجبك مجرد انك تقف ورا حاوية ارتفاعها 1 متر ومحطوط  فيها زبالة 3 متر ومركونة من قبل الثورة .
 روح ياعم وتعالى بسرعة ... انت لوكلوك ليه كدا

                                                    Ashraf Mostafa