Digital clock

الجمعة، 22 يونيو، 2012

الاعتراف...الاعتذار...التسامح...حتى يعلم كل منا حدوده


حد فاكر الجمعة دى..الاعلام قال عليها جمعة قندهار..والمشاركين (التيار الاسلامى) قال عليها جمعة الشريعة..مع ان مفيش لفظ كان فى الهتاف يدل على انها جمعة الشريعة..وسماها كل القوى الثورية الاخرى..جمعة عقد قران المجلس العسكرى على الاخوان..........الجمعة دى كانت 19 نوفمبر 2011...نزل بعدها شباب ثوريين كتير جدا..واتخنقوا من اللى حصل..ورفضوا واستنكروا كل احداث الجمعة دى وتقريبا نزلوا بالليل فى التحرير بعد ما الجمعة اتفضت وهتفوا يسقط يسقط حكم العسكر...فضلوا من الجمعة بالليل لغاية الجمعة اللى بعدها..6 ايام((احداث محمد محمود)) الامن المركزى بيضرب فيهم على الملأ امام 90 مليون مصرى وطبعا الكل فاكر جدع ياباشا جات فى عينه وفاكرين كل اللى حصل فى الاسبوع دا واستشهد 43 واصيب اكتر من 1000 شخص.......طلع الجمعة اللى بعدها الاخوان المسملين..بينادوا بجمعة التعاطف مع شعب غزة وبيستنكروا اللى حدث وبيتجاهلوه تماما..واحنا فى الوقت دا كان حالنا اصعب من غزة..وطبعا كلنا عارفين ان دا حصل لان الانتخابات كان فاضل عليها 4 ايام تقريبا او اسبوع بالكتير.دا جانب من اللى فعله الاخوان بالثورة...ودا الجانب الوحيد بالذات اللى مش ناسيه ولا عمرى هنساه او بعد 30 سنة والله....كنت بتابع الاحداث دى بشده وعاوز الانتخابات متمش تحت حكم العسكر ومدرك انها لعبة بيلهوا الاخوان والسلفيين فيها ..والطرفين مخونين بعض وبيلعبوا بمبدأ سياسة الضرب من تحت الحزام وبيجربوا حلول للى يضرب التانى وكل مرة الاخوان كانوا بيحصدوا حاجة بيفتكروا ان كدا اخدوها خلاص ويدوروا على اللى بعدها...مع ان المجلس العسكرى هو اللى بيطعمهم وعارف هيمد ايده فى بطونهم امتى وهيرجع اللى اكلوه... نرجع لموضوعنا.. المجلس العسكرى اعطاهم الهدايا دى علشان يجتذبوهم من الشوارع ويشتغلوا على شباب الثورة بهدوء من غير اخوان او سلفيين..اللى هما كتله كبيرة لو منسحبتش من الشارع...ممكن ساعتها كنا نقول مطلب واحد فقط وهو يسقط يسقط حكم العسكر...وبتواجد اكتر من 2 مليون..كنا هنسقطه فعلا وهنشكل مجلس رئاسى مدنى انتقالى.....لفت الايام وبعد ما المجلس العسكرى عمل احداث كتيرة جدا.. محمد محمود وماسبيرو ومسرح البالون ومجلس الوزرا والعباسية..الخ.....وطبعا كان للاخوان ادوار مهمة جدا فى تشويه شركائهم فى الثورة اللى اصبحوا فى اللحظات دى خصومهم وقالوا العباية ام كباسين و صفقوا لبكرى فى البرلمان على اتهامه للبرادعى بالخيانة وجمعة بانديتا والاناركيين الفوضويين اللى هيحرقوا البلد.وشباب مجلس الوزرا بتوع الترامادول وينزلوا ميلشيات مكونة من شباب الجماعة لحماية البرلمان من المتظاهرين السلميين وشباب 6 ابريل عملاء لامريكا..ماعلينا.!!...وبالفعل اصبح لدى المشاركون فى المظاهرات جانب من اليأس وطمس على ابدانهم نوع من الملل الثورى..الى ان انتهى المجلس العسكرى من شباب الميادين...وتفرغ تماما الى الهدايا التى الهى بها التيار الاسلامى من برلمان بغرفتيه مجلس شعب ، شورى.. ونقابات و اتحاد طلاب و لجنة تاسيسية..وضربهم فى 3 ايام فقط من كل جانب الى ان وصل الامر للتزوير ضد مرشحهم الرئاسى فى الايام القادمة وهذا ما اتضح من البيان الصادر منذ قليل...على الباغى تدور الدوائر...اللهم لاشماتة..كلنا فى مركب واحد فعلا...بس الاحداث دى كأنها شريط امام عينى..ومش قادر انساه..وكتير جدا من الكلام دى...ولم ارى حتى اعتذار منهم....لان الاعتذار عندهم يعنى انهم اخطأوا فوجب الاعتذار للتسامح..لن اتعاطف مع الاخوان على اى حال..طالما لم اجد اعتراف بانهم اخطؤا...فلدى الموانع الكثيرة..ولكن اهمها انهم سيأتون يوما ويتكابروا علينا مثل كثيرا من الاوقات وعندما نواجههم بالاخطاء..سيقولون لم يحدث...لانهم لم يعتذروا.

  ashraf mostafa